Plazara

Euskal Museoa Bilbaok “Plazara” aurkezten du, Museoko klaustroa topaketa, ospakizun eta aurkikuntza gune bizia bihurtuko duen kultur proposamen berria. Uztailaren 3an, 10ean, 17an eta 24an, ostiraletan, 19:30ean, publikoak euskal kulturaren adierazpen desberdinez gozatzeko aukera izango du, publiko guztiarentzat pentsatutako ikuskizun eta jarduerekin.

Emanaldi bakoitzerako sarrerak 3 eurotan daude salgai, Euskal Museoaren webgunean (www.euskalmuseoa.eus).

Plaza espazio partekatua, hurbila eta parte hartzailea izatearen ideian oinarrituta, Plazara ekimena euskal kultura herritarrei esperientzia zuzen, ireki eta garaikide batetik hurbiltzeko asmoz sortzen da. Musikak, dantzak, zirkuak, herri kirolek eta bertsolaritzak hartuko dute museoko klaustroa tradizioak eta garaikidetasunak modu naturalean hitz egiten duten giro bizi eta abegikorra sortuz.

Ikuskizunen programazioa baino gehiago, Plazara Klaustroan erakusten den Euskal Museoaren bildumaren luzapen bizia da. Aukeratutako proposamen guztiek harreman zuzena dute museoan irudikatutako lanbideekin, kultura-adierazpenekin eta bizimoduekin, eta zubi bat ezartzen dute aretoetan kontserbatutako ondarearen eta gaur egun indarrean jarraitzen duten kultura-adierazpenen artean.

Horrela, programak klaustroaren esparrura eramaten ditu euskal kulturari lotutako ezagutzak, praktikak eta tradizioak, eta jendeari esperientzia hurbilagoa, parte-hartzaileagoa eta ondarearen testuinguruan kokatuagoa eskaintzen dio.

Publiko guztientzako programa

Egitaraua uztailaren 3an hasiko da, Kankarro Konpainia eta izen bereko ikuskizunarekin. Publiko guztiarentzako proposamena da, zirkua, dantza eta musika elkartzen dituena sagarraren inguruko euskal kulturan inspiratuz, gaia eta ospakizun kolektiboa aztertuz.

Uztailaren 10ean, Aukeran konpainiak ADK3.7 Dualtasuna aurkeztuko du, dantza tradizionala eta garaikidea uztartzen dituen bidaia koreografikoa, eta bizitzaren eta memoria kolektiboaren parte diren dualtasunei buruz hausnartzeko eszenaratze murgiltzailea.

Uztailaren 17ko hitzorduan, Sustabiz Fundazioa izango da protagonista, kasu honetan kirolari espezializatuen erakustaldien eta familientzako eta bisitarientzako partaidetza-jardueren bidez publikoari herri kirolen unibertsoa hurbilduz, euskal kirol-kultura tradizionalaren diziplina esanguratsuenetako batzuk hurbiletik ezagutzeko aukera eskainiz.

Zikloa uztailaren 24an amaituko da bertso saio musikatu batekin, bertsolariak eta musikariak bilduko dituen proposamenarekin (Gai-jartzailea: Maite Berriozabal. Bertsolariak: Nerea Ibarzabal, Oihana Bartra, Miren Amuriza, Uxue Alberdi. Musikariak: Araitz Bizkai eta Oihana Landaen) euskal kultur adierazpen enblematikoenetako baten balioa azpimarratuko duen emanaldian.

Ekimen honen bidez, Euskal Museoak euskal kultura-ondarea zabaltzeko eta balioesteko konpromisoa indartzen du, topaketarako, parte hartzeko eta gaur egungo gizartearekin eboluzionatzen eta hitz egiten jarraitzen duen kultura biziaz gozatzeko gune berriak sortuz.

Informazio praktikoa

PLAZARA

Egunak: 2026ko uztaileko 3, 10, 17 eta 24, ostiralak

Ordua: 19:30 h

Tokia: Euskal Museoko Klaustroa

Sarbidea: Gurutze kalea 10. Bilbo

Sarrera: 3 €

Sarreren salmenta: www.euskalmuseoa.eus