Bilboko Erraldoiak eta Buruhandiak Bilboko Euskal Museoan eta San Frantziskoko aztarnategian egingo diren haurrentzako udako tailerren protagonistak izateko prestatzen ari dira

Pertsonaia mitiko horien erakusketa uztailaren 1etik irailaren 6ra bitartean bisitatu ahal izango da, eta lehen aldiz bi gunetan aldi berean ikusgai egongo da: Bilboko Euskal Museoko klaustroan eta San Frantziskoko aztarnategian

Erakusketarekin batera, haurrentzako jarduerez betetako programazio zabala izango dugu: sormen-tailerrak, erraldoien dantza, jolas guneak eta euskal kultur ondarea ezagutzeko proposamenak

Bilboko Erraldoiak eta Buruhandiak Bilboko Euskal Museora eta San Frantziskoko aztarnategira itzuliko dira uda honetan erakusketa partekatu baten bidez; horrez gain, haurrentzako tailerren programazio zabal baten protagonistak izango dira, familiek jaietako unibertso hori modu dibertigarri, parte-hartzaile eta sortzailean ezagutzeko diseinatu dena.

Uztailaren 1etik irailaren 6ra bitartean bisitatu ahal izango den Bilboko Erraldoi eta Buruhandi erakusketak (Euskal Museoko sarrera doakoa da asteazkenetan, eta aztarnategikoa ostegunetan) jarduera bereziak izango ditu bi egoitzetan, haurrak Bilboko kultura herrikoiaren tradiziorik enblematikoenetako batera hurbilarazteko.

Erraldoi batek bezala dantzan

Jarduera berezienetako bat Erraldoiak Dantzan izango da, Ondalan konpartsarekin elkarlanean egingo den parte hartzeko tailerra, uztailaren 10ean, 17an, 24an eta 30ean eta abuztuaren 7an, 11:00etan, Euskal Museoan. (Tailerra doakoa da Museoko sarrera erosita)

Sei urtetik gorako haurrei zuzenduta, tailerrak aukera emango die erraldoiek nola dantzatzen duten ikasteko eta jaietako pertsonaia horiekin lotuta dauden tradizioak ezagutzeko. Musikaren, mugimenduaren eta praktikaren bidez, parte-hartzaileak modu zuzenean hurbildu ahal izango dira Bilboko jaietan hain errotuta dagoen kultura-adierazpen horretara.

Sortu, jolastu eta imajinatu Bilboko erraldoiekin batera

Uztailaren 6, 13, 20 eta 27an, astelehenak, haurrentzako tailerrak egongo dira Euskal Museoan, Bilboko jaietako pertsonaia ezagunenetan inspiratuta. Saio bakoitza 11:00etan hasiko da, 6 urtetik gorako haurrei zuzenduta dago eta hamabost parte-hartzaile hartuko ditu gehienez.

Proposamenak txandaka garatuko dira eta honako hau barne hartuko dute:

-Erraldoi bat zure hozkailuan (uztailaren 6an)

Haurrek Pitxitxi, Doña Tomasa eta beste pertsonaia ezagun batzuetan inspiratutako iman pertsonalizatua diseinatu eta apainduko dute, gero etxera eramateko.

Jaiaren erritmoan (uztailaren 13an)

Tailer honetan Bilboko Erraldoietan oinarritutako paperezko txotxongiloa fabrikatzeko aukera egongo da, zeinaren besoak musikaren erritmora mugitu ahal izango baitira.

-Gargantuak jango zaitu (uztailaren 20an eta 27an)

Parte-hartzaileek paperezko Gargantua txiki bat egingo dute aho mugikor handi batekin, Bilboko jaietako pertsonaia maitatuenetako batean inspiratuta.

Tailer bakoitzaren prezioa 2 eurokoa izango da, tailerrak euskaraz izango dira eta izena Euskal Museoaren webgunean eman ahal izango da: www.euskalmuseoa.eus

Erraldoiak familia osoarentzat

Aipatutako tailerrez gain, Euskal Museoak parte hartzeko espazio librea jarriko du asteazkenero, uztailaren 8tik abuztuaren 19ra, goizez. (11:00etatik 13:00etara)

Haur eta familientzako txoko sortzaile honetan, aldez aurretik lekurik gorde beharrik gabe, bisitariek beren paperezko erraldoiak egin ahal izango dituzte, baita zenbait materialekin esperimentatu eta erakusketaren bisita osatzen duen jarduera batez gozatu ere.

Erraldoiak Mariaren Bihotza plazako aztarnategira ere iritsiko dira

Erakusketarekin lotutako programazioa Mariaren Bihotza plazako aztarnategira zabalduko da, non, uztaileko ostegun guztietan, 11:00etan, Zure atzamarrak Erraldoiak dira tailerra egingo den.

Jarduera honetan haurrek Bilboko Erraldoietan inspiratutako txotxongiloak sortuko dituzte, euren dantza eta pertsonaia gogokoenak formatu txikian birsortzeko.

Tailerra 6 urtetik gorako parte-hartzaileei zuzenduta dago, euskaraz egingo da, 2 euroko prezioa du, hamabost lagunentzako tokia dago eta aldez aurretik erreserba egin behar da Euskal Museoaren webgunearen bidez: www.euskalmuseoa.eus

Halaber, uztaileko eta abuztuko astearteetan, goizez eta izena eman beharrik gabe, aztarnategiak tailer irekien gunea eskainiko du, non familiek haien paperezko erraldoiak egin ahal izango dituzten eta erakusketarekin lotutako proposamen sortzaileez gozatu ahal izango duten.

Txiki-erraldoien bikote baten zozketa

Bisitaren osagarri, Euskal Museoak eta San Frantziskoko aztarnategiak “Akatsak aurkitu” lehiaketa antolatuko dute, eta txiki-erraldoi bikote baten zozketan parte hartzeko aukera emango du.

Horretarako, bisitariek bi egoitzetan ibili beharko dute, parte hartzeko txartela bete eta bi guneetako edozein postontzitan utzi.

Programazio honen bidez, bi egoitzek udako protagonista nagusi bihurtu dituzte Bilboko Erraldoi eta Buruhandiak , eta familiei aukera ezin hobea emango diete jaietako tradizio hori barrutik ezagutzeko, sortzeko eta gozatzeko.

BILBOKO EUSKAL MUSEOAREN UDAKO BESTE TAILER BATZUK

Museoaren bilduma ezagutzeko uda

Haurrentzako programazioak aurrera jarraituko du abuztuan, Euskal Museoaren bilduma iraunkorrean inspiratutako hiru tailerrekin. Jarduerak abuztuaren 3an, 10ean eta 17an izango dira, 11:00etan, 6 urtetik gorako haurrentzat.

Paperezko balea tailerraren bidez baleak euskal kulturan izan duen garrantzia ezagutuko dugu eta, ondoren, etxera eramateko paperezko balea bat sortuko dugu.

Nire armarria tailerrean, parte-hartzaileek museoko zenbait piezatan dauden armarriak eta sinboloak behatu, eta, ondoren, haien ezkutu pertsonala diseinatuko dute.

Amaitzeko, Euskararen tximeleta tailerrean, batetik, euskarazko hitz-jokoak eta, bestetik, euskal kulturarekin lotutako esamolde eta mezuekin apaindutako tximeleta baten sorkuntza konbinatuko ditugu.

Tailerrek bi euroko prezioa izango dute, euskaraz egingo dira, 15 lagunentzako tokia izango dute eta Museoaren webgunearen bidez izena ematea beharrezkoa izango da.

HAURRENTZAKO TAILERREN LABURPENA